تشتكين البعد والفرقا ظلام
................. تطرقين الوصل من باب العدم
والسكوت الي يدور للكلام
............داخل انفاسي من البعد انهزم
قبلك احساسي شكى منك الهيام
.........................ضايعٍ مابين تغريب وندم
قلبي الي منك ضايع مايلام
.................شاف منك الود يسقيه العشم
كنت احسْبه فالهوى ماله مرام
....................احسبه يسلم ولكن ماسلم
أول الرحله مواعيد وغرام
........................وآخر الرحله تناهيد وندم
كيف انا بنساك يابدر التمام
...............وانت لك في داخلي هذا الزخم
يندفع لك نبض غالي مايسام
..............داخل ابياتي على المعنى وسم
يرسم احساسي بلوعه واحتدام
....................كن صدري منفجر جوفه لغم
اشتكي لك منك وأبتل الحزام
.................وقلبك القاسي لقلبي ما رحم
من عذابي يوم اشوفك فالزحام
..................ودي انطق لكن احروفي عجم
يعربي فالحرف ولساني حسام
...................مير قلبي من صدودك منصدم
أعرفك عِرف النحاوي للكلام
......................واعرفك عِرف المحابر للقلم
مير من صدك غشى جوي عسام
...................وصادق الإحساس مايتبع وهم
ذي دروب العشق مافيها سلام
.................من مشاها يكشف اسرار الألم
أعشقك واهواك عامٍ خلف عام
...............لو صدودك لي مثل شوك السَلم
تشتكين البعد ياعيني ... حراااام
................مادريتي عن شعور الي انظلم !؟